A humanización da oncoloxía centra o IV Encontro de Voluntarios da AECC na Coruña

O valiosísimo labor da Asociación Española contra o Cancro apóiase en gran medida no voluntariado. Unhas catrocentas desas persoas que dedican desinteresadamente parte do seu tempo a axudar os enfermos, recadar fondos ou realizar actividades de prevención reuníronse na Coruña nun encontro no que se fala de investigación e tamén da importancia de humanizar os procesos oncolóxicos.

Vida, futuro e esperanza son as palabras que máis se repiten nun mural construído coas mensaxes de pacientes e familias que pasan por un proceso oncolóxico, un camiño duro no que a innovación científica e terapéutica debe ir necesariamente asociada a unha atención humanizada.

"Nunca nos conformaremos con como se sente o paciente na sociedade, no sistema sanitario ou na súa contorna laboral. Humanización é a voz do paciente, é escoitar oque necesita e procurarllo", di Manuel Aguilar, que preside a xunta provincnial da AECC na Coruña.

Porque detrás das probas e dos tratamentos hai persoas que precisan que as escoiten e as acompañen, que teñen dereito a ser informadas e a decidir. A humanización dos servizos de oncoloxía é unha necesidade urxente e ética que esixe unha mirada multidisciplinar.

"A figura do psicooncólogo é parte integral da atención ao paciente oncolóxico. Hoxe o tratamento non se entende sen a multidisciplinariedade porque o cancro é unha efermidade complexa desde o punto biolóxico, médico, social e persoal", explica Rosario García Campelo, xefa do servizo de oncoloxía do CHUAC.

Acompañar os pacientes e as familias é unha das misións da Asociación Española Contra o Cancro. Os voluntarios reuníronse no Palexco nun encontro que tamén foi de recoñecemento ás institucións e aos medios de comunicación que apoian o seu labor.  

O esforzo conxunto fixo posible recadar un millón trescentos mil euros para a investigación.  Os avances na loita contra o cancro veñen da man da inmunoterapia e medicina de precisión. Da man dunha ciencia que debe ter alma e ofrecer unha atención próxima e empática.