A Garda Civil atopa 22 cans en moi malas condicións nunha casa en Moaña

Axentes do Seprona comisaron preventivamente 22 cans que se atopaban en pésimas condicións hixiénico sanitarias en Moaña. Segundo informou este luns a Garda Civil, foi a Protectora de animais do Morrazo a que os puxo ao corrente do estado dos cans, dos que dicían que estaban nun espazo reducido do que saía un cheiro bastante forte.

Os axentes foron inspeccionar o lugar, e o fillo do dono dos cans indicoulles que o seu pai, que é quen se encarga dos animais, estaba ingresado no hospital, quedando outro familiar a cargo deles. Os axentes localizaron os cans, todos podengos e moitos encadeados con cadeas moi curtas que lles limitaban a mobilidade, nun galpón na parte traseira da casa.

Había 16 femias e 6 machos, 13 deles non están identificados con microchip e a maioría presentan signos notorios de padecer sarna; ademais, hai varias cadelas con signos de parir recentemente. Ante esta situación sanitaria ilegal dos animais, os axentes decidiron levalos preventivamente ao centro de acollida que ten concertado o Concello (protectora de Morrazo) para que lles dean os tratamentos veterinarios que precisan.