A obra 'Reconversión', de Ibuprofeno Teatro, triunfou este mércores nos XXX Premios de Teatro María Casares con seis galardóns, mentres que os mellores actor e actriz protagonistas foron Fran Lareu, por 'Un tal Romeo', e Natalia Pajarito, por 'A serie Clopen', respectivamente.
A gala celebrada no teatro Rosalía de Castro da Coruña deixou a Fran Lareu como dobre premiado, pois tamén gañou o de mellor actor secundario por 'Reconversión'.
Esta obra, de Ibuprofeno Teatro, alzouse cos galardóns de mellor espectáculo, mellor dirección (Santiago Cortegoso, Carlos Álvarez-Ossorio e Natalia Feijoo), mellor texto orixinal (Santiago Cortegoso), mellor actriz secundaria (Cristina Collazo) e mellor espazo sonoro (Alonso Caxade), ademais do citado de Fran Lareu, ata un total de seis das súas once nominacións.
Tres obras obtiveron dous dos María Casares, mentres que outras catro levaron os catro restantes, unha cada unha.
'A serie Clopen', do Centro Dramático Galego, tivo a mellor actriz protagonista (Natalia Pajarito) e a mellor dirección de movemento (Marta Alonso Tejada), entre dez nominacións.
'TROMSØ', de Morraoconto, levou o mellor espazo escénico (Rafa Martínez, Miguel Gendre, Lara Pouso e José Faro 'Coti') e a mellor iluminación (José Faro 'Coti'), que optaba a sete galardóns.
'Berenguela na Gaiola', de Galeatro e Xarope Tulú, foi o mellor espectáculo infantil e tivo tamén o premio á mellor adaptación ou tradución (Paula Carballeira).
Cun premio cada unha estiveron 'Un tal Romeo', de Aramboia, co mellor actor protagonista (Fran Lareu); 'A biblioteca galáctica contra a IA fantástica', de Tanxarina, como mellor espectáculo de marionetas, obxectos e figuras animadas; 'Alta costura', de Elefante Elegante, co mellor vestiario (Carolina Díguele), e 'O libro da selva, o musical', de Ártika Cía, co mellor maquillaxe (á propia compañía).
A gala, dirixida por Gloria Rico, estivo centrada na figura do recentemente falecido Manuel Lourenzo, histórico actor e dramaturgo galego cuxo espírito lembraron os presentes.
