A Fiscalía recorre a absolución de Dani Alves ante o Supremo
Acusa o TSX de Cataluña de condenar moralmente á vítima e interpretar de forma "cruel e arbitraria" unha proba biolóxica
O fiscal sostén que a sentenza supón un retroceso histórico na valoración do consentimento
A Fiscalía presentou un recurso ante o Tribunal Supremo contra a sentenza que absolveu o futbolista Dani Alves da violación dunha moza en Barcelona en decembro de 2022.
No escrito, o fiscal do Supremo Fidel Cadena critica que o Tribunal Superior de Xustiza de Cataluña (TSXC) exculpase a Alves ao cuestionar a credibilidade da vítima e realizar unha interpretación que cualifica de "completamente cruel e arbitraria" dunha proba biolóxica clave.
Segundo o fiscal, o feito de que a moza accedese a entrar voluntariamente no baño con Alves non pode entenderse como un consentimento previo para calquera práctica sexual: "Sería retroceder séculos na valoración do consentimento". Para o ministerio público, esa interpretación supón recuperar ideas medievais, como que unha muller que bebe cun home acepta todo.
Proba biolóxica mal interpretada
O recurso denuncia que o TSXC introduciu feitos novos que non aparecían na sentenza de primeira instancia -que condenara a Alves a catro anos e medio de cárcere- como a presenza de esperma na boca da vítima.
Esta afirmación, que contradí a versión da moza de que non houbo felación, é rexeitada pola Fiscalía.
Os peritos, segundo o escrito, non atoparon restos de esperma e explicaron que o ADN podía proceder doutros contactos, como bicos ou bebida compartida.
O fiscal considera que esta interpretación supón "unha condena moral" para a vítima, que xa expresara desde o inicio o seu medo a non ser crida. Tamén critica que o tribunal a acuse de mentir baseándose nunha proba mal interpretada, o que converte o proceso nun "calvario moral" para a moza.
Crítica á esixencia dun relato perfecto
O recurso insiste en que a versión da vítima é "absolutamente crible" e que as imprecisións do seu relato responden a un bloqueo traumático "lóxico e inevitable".
O fiscal cuestiona que se lle esixa unha declaración perfecta e precisa, sen ter en conta que cada persoa vive e expresa os traumas dunha maneira distinta.
Por todo isto, a Fiscalía solicita ao Supremo que dite unha nova sentenza condenatoria por agresión sexual ou, alternativamente, que devolva o caso ao TSXC para que o resolva unha sala composta por maxistrados distintos aos que ditaron a absolución.
