A Fiscalía Europea abre unha segunda investigación por posible fraude no mantemento do AVE

A Fiscalía Europea (EPPO) informou este venres da apertura dunha segunda investigación sobre posible fraude de fondos europeos na renovación e mellora da seguridade, sinalización e sistemas de comunicacións na liña de AVE Madrid-Sevilla tras o accidente do pasado 28 de outubro en Urda (Toledo).

O organismo europeo está a levar a cabo "medidas de investigación" na sede do Adif en Madrid, así como na Axencia Estatal de Seguridade Ferroviaria (AESF) e no Tribunal de Contas, en colaboración coa Unidade Central Operativa de la Garda Civil (UCO).

"Esta confirmación excepcional prodúcese tras o grande interese público e non se facilitarán máis detalles hoxe por hoxe da investigación", explicou a EPPO, que se encarga de investigar, axuizar e xulgar os delitos contra os intereses financeiros da UE.

O pasado 20 de marzo, a EPPO xa abriu de oficio outra investigación nos mesmos termos tras o accidente que tivo lugar o pasado 18 de xaneiro na localidade cordobesa de Adamuz, no que faleceron 46 persoas.

Naquela data, a Fiscalía informou sobre o inicio de pescudas en relación ao "mantemento do tramo de vía férrea próximo ao quilómetro 318,7 e á localidade de Adamuz (Córdoba, España), na liña de alta velocidade (AVE) que conecta Madrid e Sevilla".