A Coruña, zona tensionada, por Venancio Salcines

A Coruña quere declarar a cidade como zona tensionada, aposta pola ferramenta que lle dá a lei de Vivenda. Adopta, ante un problema de prezos, unha estratexia de regulación dos mesmos. A economía dinos que cando temos un desaxuste entre oferta e demanda, a resposta ten que estar aí, en traballar ou ben coa oferta ou coa demanda, ou con ambas.

No caso do mercado de alugueiro é evidente que non podemos actuar sobre a demanda, e aínda que fora posible non sería desexable. Que queira vivir mais xente nunha cidade sempre é positivo. E na Coruña cada día quere vivir máis xente. Polo tanto as políticas desexables teñen que estar do lado da oferta. E neste xeito A Coruña ten un ambicioso plan de vivenda, quere que se incremente a oferta en catro mil vivendas en seis anos. Na medida que este plan sexa efectivo tamén será efectiva a estratexia de zona tensionada. Ambas teñen que ir da man. Ese será o reto da súa alcaldesa.