A caída de peregrinos polos recortes en voos a Galicia preocupa os operadores turísticos

Operadores turísticos e axencias que traballan co Camiño de Santiago están preocupados pola caída de peregrinos internacionais que vai provocar a perda de conexións aéreas en Galicia, unha das cuestións que protagoniza as conversacións entre os participantes do foro Fairway.

"É un comentario xeneralizado", asegurou a EFE uno dos codirectores de Fairway, Manuel Oreiro, que sinalou que é das primeiras preguntas que lles fan os operadores turísticos e axencias de viaxes que participan neste foro de profesionais do Camiño celebrado esta semana en Santiago.

Oreiro lembra que a maioría destas axencias traballa con clientes europeos e, aínda que non quere ser "catastrofista", os recortes da aeroliña Ryanair -que pecha a súa base de Santiago, mete tesoira nas rutas da capital galega e sae de Vigo- van provocar "moitísimos problemas".

Esta situación "seguro" que vai provocar unha caída no número de peregrinos e desde Fairway só poden responder á inquietude dos profesionais dunha forma:

"Non podemos dicirlles moito máis alá que desde o sector turístico estamos a tentar que as administracións nos apoien e que se coordinen para que volva haber unha boa conexión aérea".

Pero dentro do sector, afirmou o codirector de Fairway, non teñen moitas esperanzas de que o grupo de traballo creado para mellorar a coordinación dos aeroportos galegos teña éxito para resolver a situación.

Menos peregrinos e voos máis caros

Un dos operadores turísticos preocupados por ese impacto é CaminoWays, que traballa sobre todo con peregrinos de Irlanda, o Reino Unido, os Estados Unidos, Australia, O Canadá e Nova Zelandia.

O seu director, Roland Monsegu, cre que a decisión de Ryanair vai reducir o número de peregrinos e ademais vai aumentar o prezo dos voos restantes, o que se suma ao incremento que xa sufriron nos últimos anos, sinalou a EFE.

Ao recorte de voos súmase o peche do aeroporto de Santiago entre o 23 de abril e o 27 de maio do 2026 polas obras de renovación da pista.

"Maio é o noso segundo mes con máis negocio", lamentou Monsegu, que aventura que poden perder a metade dos peregrinos habituais ese mes e que os principais afectados serán os pequenos negocios que hai ao longo de todo o Camiño.

A boa noticia é o voo directo que United Airlines operará tres veces á semana entre Nova York e Santiago a partir de maio, que reforzará aínda máis o crecemento do mercado estadounidense, o principal país de procedencia de peregrinos tras España.

"Xa temos varios centos de clientes con reservas nese voo para o próximo ano. É unha solución fantástica", celebrou Monsegu.