A Audiencia Nacional volve revogar a semiliberdade da ex xefa de ETA Soledad Iparraguirre

 A Audiencia Nacional volveu revogar o réxime de semiliberdade concedido, en aplicación do artigo 100.2 do Regulamento Penitenciario, á ex xefa de ETA Soledad Iparraguirre, Anboto, así como os terceiros graos dos membros da banda terrorista Juan Antonio Olarra Guridi e Arkaitz Aguirregabiria.

En tres autos, o Xulgado de Vixilancia Penitenciaria estima os recursos da Fiscalía contra a proposta da Xunta de Tratamento no caso de Anboto e contra as decisións do Goberno vasco en relación con outros dous presos de ETA.

O xuíz José Luis Castro xa revogou hai meses o réxime de semiliberdade de Anboto e, no auto coñecido este martes, lembra que nada cambiou respecto daquela e subliña a gravidade dos delitos polos que foi condenada.

Son, segundo lembrou no auto anterior, 10 asasinatos, tenza de explosivos, atentados, estragos, incendios, tenza de armas e delitos contra a Coroa, que se acumularon nunha pena de 30 anos de prisión.

A data de cumprimento definitivo da condena de Anboto é setembro de 2034, segundo sinala o xuíz.

A Xunta de Tratamento do cárcere donostiarra de Zubieta, onde Anboto está encarcerada, propuxo por segunda vez que gozase dun réxime máis flexible, en virtude do mencionado artigo do Regulamento Penitenciario, e saíse do cárcere de luns a venres para realizar labores de voluntariado, coa obriga de regresar ao centro para durmir.

Unha medida que recorreu o Ministerio Público e que agora foi revogada polo xuíz, que considera que, máis alá da actividade de voluntariado, a Administración penitenciaria non achegou novos elementos que xustifiquen a aplicación do mencionado réxime.

Na súa opinión, o acordo do cárcere carece "da novidade cualificada esixible para lexitimar unha nova reconsideración do asunto nun prazo temporal tan reducido".

O xuíz anula dous terceiros graos

O maxistrado tamén revogou o terceiro grao que o Goberno vasco concedeu a Juan Antonio Olarra Guridi e Arkaitz Aguirregabiria.

Respecto ao primeiro, autor de 10 asasinatos consumados e 144 frustrados, o xuíz si aprecia nel unha evolución positiva, pero apunta que lle foi concedido en xullo de 2025 o réxime flexible do artigo 100.2 e que aínda transcorreu un período relativamente curto.

Para gozar do terceiro grao, explica, necesítase máis tempo para constatar a existencia de factores favorables, e lembra que se trata dun caso con delitos de terrorismo de extrema gravidade, nos que a evolución debe analizarse como unha valoración complexa na que se unen factores propios do tratamento, cumprimento da condena e pagamento da responsabilidade civil como mecanismo de reparación ás vítimas.

Por iso, considera que Olarra Guridi, con condena ata 2032, debe permanecer no réxime do artigo 100.2, ao tratarse de delitos de terrorismo, que "constitúen unha das formas máis graves de delincuencia contra as vítimas, os dereitos fundamentais das persoas e o propio sistema democrático".

Respecto a Arkaitz Aguirregabiria, autor de 38 delitos de terrorismo, entre eles o asasinato do xendarme francés Jean-Serge Nérin, o xuíz acorda mantelo no mesmo réxime de semiliberdade e subliña tamén a gravidade dos seus delitos.

O maxistrado sinala que o réxime no que se atopa actualmente lle permite "seguir un programa de reinserción no que se inclúe a inserción laboral" e que debe continuar ata "constatar unha consolidación das diferentes variables clasificatorias que permitan preparar o penado para maiores cotas de liberdade".

Incluída, engade, a liberdade condicional, tendo en conta que as tres cuartas partes da condena se cumpriron o 22 de agosto de 2023, pero que o cumprimento definitivo está previsto "aínda" para novembro de 2029.