A acusación particular di que a nai de Desirée “sabía o que facía”
A acusación particular di que a nai de Desirée “sabía o que facía”
A acusación particular, exercida polo pai da pequena Desirée Leal, cre que a única acusada do crime, Ana Sandamil, nai da nena, estaba en plenas facultades cando esganou a súa filla en Muimenta, e por iso piden para ela a pena de prisión permanente revisable.
Será clave coñecer o testemuño do perito forense, que será quen intentará explicar cal é o estado de saúde da acusada, tanto cando cometeu o crime como no momento actual.
O pai, José Manuel Leal, asegura que a acusada usaba a nena para facerlle dano a el, que aínda que non era agresiva si era especialmente posesiva.
"Que o monstro que cometeu esta barbaridade pague coa pena máxima"
"Xustiza de verdade nunca se lle vai facer", dicía ás portas da Audiencia Provincial, onde se vai celebrar o xuízo e onde será unha das persoas que ten previsto declarar hoxe. "Pero que polo menos o monstro que cometeu esta barbaridade pague coa pena máxima estipulada neste país", aseguraba José Manuel Leal.
"Eu non son psicólogo, pero se estaba tan mal, como é que non se fixo dano ela mesma en lugar de á nena", di o pai.
En declaracións aos medios de comunicación, José Manuel Leal mostrouse totalmente desfeito pola morte da súa filla e asegurou que a súa vida se viu “truncada para sempre” por mor do crime.
O pai da pequena Desirée agarda que "se faga xustiza"
"Sabía o que facía", asegura o avogado da acusación
"Pedimos a prisión permanente revisable, entendemos que a autoría é clara e que, aínda que ten un trastorno diagnosticado, fíxoo en pleno uso das súas facultades porque así o evidencia o seu comportamento tanto antes coma despois", afirma o avogado da acusación particular, José Manuel Ferreiro.
"A cuestión é como estaba a súa mente nese momento. E eu o que vou intentar facer ver ao xurado é a diferenza entre un psiquiatra que diagnóstica e che dá un tratamento e o que é un psiquiatra forense que analiza todo o que rodea o caso", explica o avogado.
"A nai sabía o que facía" cando supostamente matou a nena, dixo o letrado. “A nosa postura é idéntica á da Fiscalía e da acusación popular.
Nese sentido, o avogado que exerce a acusación popular en representación da Fundación Amigos de Galicia, Francisco José Lago, tamén sostén que a nai da nena "conserva as súas facultades mentais e sabía o que facía".
"En principio, pola proba practicada, nós sostemos que é imputable, que conserva as súas facultades mentais e que sabía o que facía", declarou o letrado antes da celebración do xuízo.
De feito, opinou que "a pesar de saber o que estaba a facer, decidiu seguir adiante", pois "urdiu un plan" para acabar coa vida da filla "semanas antes" e levouno a cabo.
