A acampada pola vivenda de Vigo crece ata as 60 tendas a pesar da choiva

A acampada pola vivenda de Vigo superou os dez días e chega ás 60 tendas a pesar da choiva, que lles obrigou a reforzar as súas estruturas.

A alameda da Praza de Compostela acolle unha trintena de persoas que pernoitan alí diariamente para esixir solucións á crise habitacional, o cesamento dos desafiuzamentos e a regulación dos alugueiros e pisos turísticos.

Os manifestantes subliñaron que tamén contan cunha comisión de seguridade, que se encarga de facer gardas para protexerse de agresións como as sufridas nos últimos días. A pesar do lanzamento de ovos ou petardos, o colectivo destaca nun comunicado o masivo respaldo da cidadanía, que colabora con material e comida quente diaria, así como o aval de asociacións ecoloxistas polo uso respectuoso do espazo público. O colectivo conta con diversas normas de convivencia para garantir a súa mellor coexistencia coa contorna, como a prohibición de consumir alcol ou outras drogas. 

Organizados mediante asembleas e comisións de traballo que garanten a loxística, convivencia, seguridade e coidados, os participantes reforzaron as estruturas en que pernoitan para facer fronte ás primeiras chuvieiras mentres manteñen unha intensa programación cultural e concentran esforzos na preparación da folga xeral convocada para o 11 de novembro.