Alfonso Villares: “A miña cabeza non está en máis nada que levar adiante este traballo”

Alfonso Villares tomou posesión este martes como novo delegado territorial da Xunta en Lugo, no transcurso dun acto que tivo lugar no salón de actos da sede da administración autonómica na capital lucense, no que estivo arroupado por tres conselleiros do Goberno galego, María José Gómez, de Medio Rural; Diego Calvo, de Presidencia; e Antonio Gómez Caamaño, de Sanidade.

Ao finalizar a toma de posesión, á que tamén asistiu unha nutrida representación de alcaldes da provincia de Lugo, entre eles a da capital, Elena Candia, así como os xefes territoriais das distintas consellerías, Villares dixo aos medios de comunicación que agora a súa “cabeza” está centrada en “levar adiante” o seu traballo como delegado da Xunta na provincia.

Contestou así aos xornalistas que lle preguntaron se o cargo que xurou esta mañá en Lugo podía ser outra estación na súa carreira política, coa mirada posta xa no período electoral de 2027. “Para min foi unha sorpresa enorme estar hoxe aquí e con esta responsabilidade tan grande. A miña cabeza agora está centrada en levar adiante este traballo, crédeme, non está para nada máis”.

De feito, subliñou que este nomeamento colleu por “sorpresa” a todo o mundo. “Á fin e ao cabo, estas decisións, quen as ten que tomar, tampouco as comenta con moitísima antelación. Creo que, neste caso, se foi unha sorpresa para vós, tamén o foi para min”. De feito, indicou que ía poñer “toda a súa capacidade de traballo ao dispor dos veciños de Lugo” para “responder as expectativas que o goberno galego, que o presidente Rueda, depositou” sobre el.

En canto á denuncia por unha suposta agresión sexual que o levou a renunciar ao seu cargo como conselleiro do Mar, agora arquivada pola Xustiza, Villares lembrou que, no seu momento, “dimitiu ao día seguinte de recibir comunicación por unha investigación” en curso. A partir de aí, engadiu o delegado territorial, “foron os tribunais, dous tribunais distintos, e fóra dese aforamento” os que desestimaron “levar adiante esa acusación”.

Por iso, “son inocente de calquera causa na que se me puido sinalar”, resolveu. En canto á función que vai desempeñar como representante da Xunta de Galicia en Lugo, lembrou que o traballo realizado nos últimos anos na Delegación Territorial foi “moi positivo”, porque “así o valoran os veciños” nas “distintas contendas electorais”.

Por iso, manifestou que a súa intención agora é “achegar”, coa súa “forma de ser”, con “proximidade”, con “humildade” e con “traballo de equipo”, un “gran de area o máis grande posible” para que “os nosos veciños poidan estar moito mellor” e a “provincia siga crecendo”. “Quero cumprir as expectativas e non defraudar a ninguén”, concluíu.