A Xunta ve unha "boa noticia" o arquivo da causa contra o exconselleiro Villares
Diego Calvo cre que “non hai causa” e di que “respectamos naquel momento as decisións da Xustiza e respectámola agora, como non pode ser doutra maneira”
O conselleiro da Presidencia, Diego Calvo, considerou este martes que o arquivo da causa contra o exconselleiro de Mar Alfonso Villares é unha “boa noticia”.
O Xulgado de Instrución número 2 de Ferrol decidiu arquivar a causa por presunta agresión sexual contra Villares e agora debe ser a Audiencia Provincial da Coruña a que ditamine se confirma ou revoga o paso dado pola xuíza instrutora.
Preguntado respecto diso, Calvo destacou que onte se coñeceu que “non hai causa” contra Villares e “loxicamente” no Goberno galego “alegrámonos por el”.
“Nós respectamos naquel momento as decisións da Xustiza e respectámola agora, como non pode ser doutra maneira”, resolveu o conselleiro.
O PPdeG agarda que quede "en nada"
O PPdeG contrapón a súa forma de actuar durante o proceso coa do PSdeG. A súa secretaria xeral, Paula Prado, denuncia que o socialista José Tomé siga como alcalde de Monforte a pesar de estar implicado nun presunto caso de acoso sexual
En declaracións durante un acto en Viveiro (Lugo), Prado destacou o significado desta resolución xudicial que "pon fin á instrución do caso sen auto de procesamento, sen abrir xuízo contra o exconselleiro" e dixo que o partido espera agora que a Audiencia provincial ratifique esta resolución coa que "se demostrou que a investigación acabou en nada".
