'Sirat' e Oliver Laxe agardan facer historia nas candidaturas aos Óscar
O filme dirixido polo galego aspira a ser seleccionado en cinco categorías
Hammet e One battle after another parten como as favoritas tras o seu éxito nos Globos de Ouro
O anuncio das candidaturas poderá seguirse en G24.gal a partir das 14:30
Sirat, o filme do director galego Oliver Laxe, está a un paso de facer historia nos nomeamentos dos premios Óscar, que se coñecerán este xoves, tras a súa inédita presenza en cinco categorías.
A traxectoria da cinta española marca un fito histórico para a industria española: é a primeira vez que unha longametraxe deste país logra a preselección simultánea en cinco categorías diferentes dos premios de máis sona na industria do cinema.
Ademais de aspirar ao nomeamento a mellor película internacional, unha terna en que se verá as caras con títulos como a brasileira O Axente Secreto, a norueguesa Valor sentimental, a francesa Un simple accidente ou a tunisiana A Voz de Hind, Laxe competirá por quedar entre os finalistas a mellor fotografía, mellor música orixinal, mellor son e mellor cásting.
Se finalmente logra as cinco candidaturas saberase a partir das 14:30 deste xoves. Será nunha comparecencia na que a actriz Danielle Brooks e o actor Lewis Pullman anunciarán as candidaturas, nas que as películas Hammet e One battle after another parten como as favoritas nas categorías principais.
