"Non queremos ser unha marca de luxo, inspíranos, pero non queremos cambiar a esencia de Zara", di Marta Ortega en 'Vogue'

A presidenta de Inditex asegurou que non quere que Zara, o buque insignia do grupo, sexa unha marca de luxo, algo que os inspira, pero que traballan para ofrecer un "produto ben feito" que chegue ao maior número de persoas.

"Non queremos ser unha marca de luxo. É un sector admirable e inspíranos moitísimo a todos, pero non queremos cambiar a esencia de Zara. O noso obxectivo é ofrecer un produto ben feito que chegue ao maior número de persoas posible", afirma Marta Ortega.

Nunha entrevista á revista Vogue España que recolle Europa Press, Ortega reiterou que as "cousas bonitas e ben deseñadas non deberían estar reservadas só a uns poucos".

"A clase social non ten nada que ver co estilo", indicou.

Marta Ortega explicou que o modelo da compañía está "enfocado totalmente á demanda".

"A clave reside en manter un nivel de stock axustadísimo e reducir os excedentes ao mínimo.  Menos do 1 % do produto queda sen vender: non realizamos grandes tiradas que non funcionan e que logo hai que almacenar nunha nave", asegurou. 

 A presidenta de Inditex recoñeceu que é un "orgullo" seguir os pasos de seu pai, Amancio Ortega, que acaba de facer 90 anos.

"Non pretendo ser coma meu pai, porque ninguén o será xamais", subliñou.

"Sinto que estou nun gran momento vital. Fago un traballo co que gozo cada día e comparto xornada con profesionais incribles. Poder dedicarme a isto nunha cidade que me permite estar preto dos meus é un privilexio enorme. E non só dos meus fillos, senón de toda a miña familia, que me axuda unha barbaridade", confesou.

Coa presidencia de Marta Ortega Zara elevou o seu status con asociacións estratéxicas como as de Steven Meisel, Vincent Van Duysen, Marisa Berenson, Luca Guadagnino, John Galliano ou a máis recente con Bad Bunny.