Un novo grupo de 74 españois abandona Gaza

Un total de 74 españois saíron hoxe da Franxa de Gaza a través do paso fronteirizo de Rafah, desde onde puxeron rumbo cara á capital exipcia despois de rematar todos os trámites para abandonar o enclave palestino asediado por Israel desde hai máis dun mes.

É o segundo grupo que abandona Gaza despois de que outras 40 persoas con cidadanía española ou con dobre nacionalidade o fixesen onte, o cal eleva a 114 a cifra de hispano-palestinos evacuados.

Inicialmente estaba previsto que hoxe saísen 80 persoas, pero ao final cruzaron 74 sen que transcendese o motivo polo que seis persoas permaneceron en Gaza. En dous días de evacuación, practicamente saíu máis da metade da comunidade con pasaporte español de Gaza, estimada nunhas 180 persoas, aínda que en total poderán saír case 200 persoas, incluídos cónxuxes e familiares, que ao chegaren a Exipto serán evacuados a España.

O primeiro grupo de 40 españois que saíron onte da franxa chegaron hoxe sobre as 05:00 hora local (3:00 GMT) ao Cairo e espérase que partan en avión a España en canto todos cheguen á capital exipcia. A hispano-palestina Salsabeel Hamdan, de 28 anos, formou parte deste primeiro grupo xunto ao seu marido e o seu fillo, e afirmou a EFE que "a saída foi moi difícil", aínda que agora mira con esperanza poder regresar a España e instalarse na casa dos seus irmáns en Valencia.