Israel convoca a encargada de negocios española tras un lema propalestino de Sira Rego

A encargada de negocios da Embaixada de España en Israel, Francisca Pedrós, foi convocada este luns para recibir "unha amoestación" no Ministerio de Exteriores despois de que a ministra de Infancia e Xuventude, Sira Rego, afirmase o xoves que a sociedade española apoia unha "Palestina libre desde o río ata o mar".

"Esta declaración forma parte dunha política sistemática antiisraelí impulsada polo Goberno español e o seu presidente, Pedro Sánchez", denuncia o comunicado de Exteriores, que detalla que Pedrós debe presentarse ante Gilad Cohen, director de Asuntos Político-Estratéxicos. 

Segundo o texto do ministerio hebreo de Exteriores, as palabras usadas por Rego apoian "a eliminación do Estado de Israel", aínda que o famoso lema (repetido por académicos e manifestantes en todo o mundo) avoga porque os palestinos logren dereitos básicos e o dereito á autodeterminación, en lugar de continuar vivindo baixo un réxime militar israelí desde o río Xordán ata o mar Mediterráneo.

O pasado 24 de setembro, Rego, durante un almorzo do Fórum Europa, reivindicou que España "non se equivocou de bando" ao mostrarse "ao lado dos dereitos humanos e do pobo palestino", antes de citar como mostras "de orgullo" a parada da Volta Ciclista a España ou o boicot a Eurovisión, entre outras.

"É máis, a posición da sociedade española é nítida por unha Palestina libre desde o río ata o mar. E por iso, no Goberno mantivemos durante estes anos unha posición de dignidade co recoñecemento do Estado de Palestina, co embargo de armas (...)", engadiu a ministra.

Ese mesmo xoves, a encargada de negocios de Israel en España, Dana Erlich, xa acusou a Rego de antisemitismo. "España non é antisemita. Esta ministra, si o é", escribiu Erlich na súa conta de X achegando un vídeo coas palabras da ministra.

Xa en setembro de 2025, Israel prohibiu a entrada ao país da vicepresidenta do Goberno e ministra de Traballo española, Yolanda Díaz, como de Rego, en represalia polas medidas anunciadas polo presidente do Goberno español, Pedro Sánchez.

Rego pediu entón á Unión Europea que rompese "todos os vínculos con Israel e impuxéselle sancións".

Israel continúa atacando case a diario a Franxa de Gaza, onde matou a máis de 74.000 palestinos desde outubro de 2023 -entre eles máis de 20.000 adolescentes e nenos-, segundo Sanidade gazatí, ademais de manter en Cisxordania un réxime cualificado de 'apartheid' por diversas ONG e o Alto Comisionado da ONU.