Disturbios, cargas e vinte e catro detidos na sétima xornada de protesta en Ferraz

As protestas do xoves á noite fronte á sede nacional do PSOE na rúa de Ferraz de Madrid concluíron con 24 persoas detidas e con sete policías nacionais feridos, segundo indicaron fontes do Ministerio do Interior.

Segundo os datos da Delegación do Goberno en Madrid, ningún dos axentes da Policía Nacional quedou ferido de gravidade tras os disturbios acontecidos onte á noite.

Unhas 8.000 persoas concentráronse este xoves nas inmediacións da sede socialista no marco dunhas protestas que duran xa sete días e que alcanzaron a súa xornada de maior afluencia coincidindo co acordo alcanzado polo PSOE e Junts.

Pouco antes das 23:00 horas, axentes da Policía Nacional comezaron a cargar contra os manifestantes máis violentos na confluencia entre as rúas Marqués de Urquijo e Ferraz.

Ademais, escoitáronse disparos ao chan dos axentes para disolver os manifestantes máis radicais, que tentaron traspasar os valos e que tras a resposta policial se dispersaron e deixaron contedores tirados ou mobiliario urbano queimado, entre outras desordes.

Algúns mantéñense en rúas próximas. Mentres tanto, outro grupo de manifestantes iniciou unha sentada na rúa Marqués de Urquijo.

A tensión comezou a aumentar desde as 22:00 horas na concentración, en que os participantes máis radicais, que na súa maioría levaban a cara cuberta, lanzaron obxectos illados, petardos e botes baleiros, unha violencia que foi condenada polos manifestantes pacíficos.

Tamén apareceron algunhas bengalas ao longo da protesta ante a sede do PSOE, que arrincou ás 19:00 horas e en que os máis violentos protagonizaron outros momentos de tensión ao sacudiren os valos do cordón policial.

Antes diso, a manifestación, que se dividiu en dúas zonas, transcorreu con normalidade. Nunha zona quedaron as persoas de maior idade e á fronte da concentración, xunto aos valos colocados pola policía, situáronse na súa maioría mozos, moitos deles co rostro cuberto. Este grupo empezou a provocar os axentes.

A Policía dispuxo un importante cordón para protexer a sede socialista, ante a que os manifestantes, que portaron bandeiras de España ou da Unión Europea, corearon cánticos como "Puigdemont, a prisión", "Que te vote Txapote" ou "Sánchez traidor". Tamén se escoitaron pitos, cazoladas e berros contra a monarquía e contra a prensa ao longo desta manifestación.

O líder de Vox Santiago Abascal acudiu á concentración, á que tamén se sumaron unha boa parte das 1.500 persoas que ás 19:00 horas se manifestaron ante a sede do Parlamento Europeo no Paseo da Castellana en Madrid para reclamar a Europa que free a lei de amnistía que PSOE e Junts pactaron este xoves.