Puente abre a porta ao traspaso dos servizos de proximidade ás comunidade autónomas

O ministro de Tansportes e Mobilidade Sostible, Óscar Puente, abriu a porta a que o Goberno traspase os servizos de proximidade a outras comunidades autónomas ademais de Cataluña, como dixo este venres no marco da III Xornada de Mobilidade Sostible organizada no Palau Robert de Barcelona por Eldiario.es.

Puente explicou que o Goberno está "disposto a dialogar" coas comunidades que poidan estar interesadas na cesión deste servizo.

Tamén quixo lembrar que este xoves o presidente de Andalucía, Juan Manuel Moreno Bonilla, reclamou o traspaso e preguntouse se "é unha especie de contraprogramación ao señor Feijóo".

"Claro, se rompe España por cederlle as proximidades a Cataluña, pois non sei se se vai romper un pouquiño máis se as cedemos a Andalucía. Pois se cadra é que non rompe, se cadra é que forma parte dunha xestión descentralizada de país", insistiu.

Na súa intervención na xornada, Puente descartou poñer un calendario ao traspaso de Rodalies de Cataluña, e dixo que "houbo unha alarma innecesaria no persoal" de Renfe, xa que asegurou que se manterán os dereitos laborais.

Sobre o Corredor do Mediterráneo

O ministro subliñou que a construción do Corredor Mediterráneo e do Corredor Atlántico están en marcha e son operacións "alleas á conxuntura orzamentaria" xa que están financiadas por Europa.

Lamentou que España sexa unha "excepción claramente inaceptable" na Unión Europea no transporte de mercadorías por tren e garantiu que con estes corredores alcanzarase o 10% do total.

Puente subliñou que aumentar a porcentaxe de mercadorías transportadas por tren permitirá gañar competitividade, xa que é máis barato que facelo por estrada.

A situación das cidades

Sobre as cidades españolas que están a dar pasos atrás nas infraestruturas de transporte sostibles ou nas zonas de baixas emisións, o ministro lembrou que a curto prazo deberán devolver as axudas europeas que recibiron para construílas.

A medio e longo prazo, dixo que o ministerio prevé seguir financiando unha parte do transporte público no futuro e que se fará "con criterios de sustentabilidade".

"O que non podemos é aplicar criterios meramente poboacionais con independencia de cales sexan as políticas de transporte público que se desenvolven nos ámbitos urbanos", apuntou.

Críticas á presidenta da Comunidade de Madrid

Sobre as queixas de Isabel Díaz Ayuso por non ser convidada á inauguración do tramo de alta velocidade entre Asturias e León, Puente dixo que forma parte da estratexia de "vitimismo e de clara confrontación co Goberno".

Tamén lamentou que a presidenta madrileña "leva as cousas a un extremo absurdo" e que é un agravio inventado, xa que nunca foi convidada a inauguracións de tramos ferroviarios que non tivesen que ver con Madrid.