Leo Scaloni esperta dúbidas sobre o seu futuro na selección arxentina

O seleccionador arxentino, Lionel Scaloni, deixou este martes en dúbida a súa permanencia no cargo, na rolda de prensa que concedeu tras a histórica vitoria de Arxentina por 0-1 sobre Brasil no clásico disputado no Maracaná polas eliminatorias suramericanas.

"Quero un tempo para pensar porque esta selección necesita un adestrador que teña todas as enerxías posibles", afirmou o técnico que converteu Arxentina en campión mundial en Qatar 2022 e campión da Copa América en 2021.

Scaloni fixo o anuncio ao responder a última pregunta da conferencia de prensa e a súa resposta caeu como unha bomba para os xornalistas arxentinos, especialmente porque o técnico non quixo dar máis detalles ou explicacións cando foi interrogado sobre se estaba a pensar na renuncia.

"Agora toca parar a pelota e poñerse a pensar. Teño moito que pensar neste tempo. Estes xogadores déronnos unha chea e necesito pensar", afirmou o adestrador ao referirse ao período que se abre ata os próximos partidos polas eliminatorias, en setembro do próximo ano.

"Non é un adeus. Necesito pensar porque a vara é moi alta", agregou Scaloni ao referirse a que cada vez sofre máis presións, especialmente tras a histórica derrota que Arxentina encaixou o xoves ante Uruguai na Bombonera.

A vitoria deste martes sobre o seu tradicional rival permitiulle a Arxentina manterse como líder na clasificación das eliminatorias ao Mundial de 2026 e afundir nunha enorme crise a Brasil, que nunca perdera tres partidos seguidos nunhas eliminatorias e xamais xogando como local.