As forzas terrestres do exército israelí chegan ás aforas da cidade de Gaza

As forzas terrestres do Exército israelí chegaron este luns ás aforas da cidade de Gaza tras avanzar desde o leste da franxa en dirección ao seu interior, segundo puido comprobar EFE.

Os tanques israelís alcanzaron a Estrada de Saladino, a arteria principal do enclave palestino, que o cruza de norte a sur.

O Exército de Israel informou este luns de que segue expandindo as súas operacións terrestres na franxa, despois de que o venres anunciase que ía amplialas, ademais de intensificar os bombardeos. Nos últimos días, as Forzas de Defensa Israelís aseguran que atacaron 600 obxectivos en Gaza.

A Media Lúa Vermella alerta de que o exército israelí segue bombardeando as inmediacións de tres hospitais de Gaza, onde hai 400 pacientes en coidados intensivos e 14.000 persoas refuxiadas, e urxe á comunidade internacional a intervir para que se respecten as normas do dereito internacional humanitario. Unha petición á que tamén se suma a Unión Europea.

Máis de 8.000 falecidos polos ataques de Israel

Polo menos 8.306 persoas morreron e 21.048 quedaron feridas na Franxa de Gaza, controlada polo grupo islamita palestino Hamas, polos ataques de Israel, informou este luns o portavoz do Ministerio de Sanidade gazatí, Ashraf al Qudra.

Nunha intervención televisada, Al Qudra precisou que entre eses falecidos hai 3.457 menores e 2.136 mulleres. Denunciou que as forzas israelís están "a paralizar deliberadamente" o movemento das ambulancias polo enclave palestino, o que está a impedir que desempeñen os seus labores de rescate.

O portavoz afirmou que hai 25 hospitais fóra de servizo na Franxa e que 25 ambulancias foron destruídas. Al Qudra reiterou os chamamentos para que Exipto abra o paso de Rafah, fronteirizo con Gaza, para a entrada de axuda médica e a saída dos feridos do enclave. "Instamos as organizacións internacionais a que apliquen a lei internacional para protexer as instalacións médicas", dixo.

Dende Tel Aviv elevan a 239 os secuestrados por Hamas. Entre eles estaba a moza alemá de 23 anos, secuestrada no Festival Musical pola Paz o pasado 7 de outubro. Tras semanas de incerteza sobre o seu estado, a súa familia e o Goberno de Netanyahu acaban de confirmar en redes sociais a súa morte.