A última reunión de Junts remata sen pechar o acordo para investir a Sánchez
A última reunión de Junts remata sen pechar o acordo para investir a Sánchez
Na formación de Puigdemont din que seguirán as conversas, porque a negociación aínda non rematou
A reunión da cúpula de JxCat en Bruxelas, encabezada polo expresidente da Generalitat Carles Puigdemont, terminou sen alcanzar un acordo co PSOE para a investidura de Pedro Sánchez. Así o explicaron fontes de JxCat, despois de case seis horas de reunión.
En JxCat din que aínda non hai acordo co PSOE, pero que proseguirán as conversas porque a negociación non acabou. Xusto cando terminaba a reunión de JxCat, o PSOE e ERC fixeron público un comunicado conxunto en que anunciaban o seu acordo para a investidura de Sánchez.
Na reunión, acompañaron a Puigdemont a cúpula do seu partido, como Jordi Turull, Laura Borràs, David Saldoni, Albert Batet, Miriam Nogueras, Anna Erra, Josep Rius, David Torrents, Aurora Madaula e o eurodeputado Antoni Comín.
O hotel, situado no barrio comunitario de Bruxelas, é o mesmo escenario en que Puigdemont expuxo o 5 de setembro as súas condicións para apoiar a investidura do próximo presidente do Goberno.
