A música electrónica de vangarda, no Fanzine Fest, ata o sábado na Coruña
Combina artistas emerxentes galegos con figuras de referencia
Coa banda sonora do artista galego de música electrónica Ungar, o retablo do templo preséntase como un lenzo que o público enche de cor cunha paleta virtual á que dá orixe o movemento da man. Esta é a proposta que trae á igrexa das Capuchinas o Colectivo MOM.
"O uso de software dixitais e sensores onde combinamos dun xeito sensorial porque o que queremos é que sexa como unha peza na que te integres directamente", comenta Óscar Domínguez, integrante do Colectivo MOM.
"Non temos algo moi definido porque o que nos gusta é experimentar sobre todo coa fusión de arte e tecnoloxía. No Fanzine temos propostas como esta, onte presentamos unha videocreación e o sábado faremos un set de visuais en directo", engade a integrante do Colectivo MOM Myriam Pato.
A igrexa das Capuchinas é, xunto co Castelo de San Antón, unha das novas sedes incorporadas este ano no Fanzine Fest, o festival de música electrónica que se celebra na cidade da Coruña ata o vindeiro sábado.
O codirector do festival, Pablo Cubeiro, sinala que "o que buscamos é sacar a música electrónica dos espazos nos que habitualmente se traballaba para levalos a espazos icónicos que temos na cidade. Buscar ese vínculo máis completo das artes, tanto a música coas artes visuais coa arquitectura".
Un Fanzine Fest que por noveno ano combina artistas emerxentes galegos con figuras de referencia internacional na creación electrónica.
