Sotelo: “O Lión é un bo equipo, pero a un partido podemos gañar a calquera”

O centrocampista Hugo Sotelo non esconde a dificultade que espera o seu equipo no estadio do Olympique de Lión, pero el ve o Celta capacitado para derrotar o conxunto francés e alcanzar os cuartos de final da liga Europa.

“Sabemos que imos a un campo moi complicado, que o Lión é un bo equipo, pero nós a un partido podemos gañar a calquera rival. Na ida xa vimos que é un equipo con moito talento, a min persoalmente gustoume moito, pero nós sabemos do que somos capaces”, comentou.

Nunha entrevista cos medios do club, o internacional sub-21 lembrou que este ano xa gañaron ao Real Madrid “no Santiago Bernabeu” e o domingo á noite empataron co Betis na Cartuja, nun partido do que saíron “reforzados” para a batalla que lle espera en Lión.

Por iso, o canteirán, unha das novidades no once inicial de Claudio Giráldez, pediu “valorar” o punto sumado ante o conxunto dirixido polo chileno Manuel Pellegrini. 

O equipo realizou esta mañá o último adestramento antes de partir mañá cara a Lión.