O presidente de Ucraína, Volodímir Zelenski, anunciou este xoves no Foro Económico de Davos que o equipo negociador de Kiev se citará o venres e o sábado con delegacións dos Estados Unidos e Rusia nos Emiratos Árabes Unidos (EAU) para avanzar no camiño cara a un final negociado da guerra en Ucraína.
Así o indicou Zelenski mentres respondía preguntas tras a súa intervención no encontro internacional que acolle a localidade suíza de Davos.
“Espero que os Emiratos o saiban. Ás veces temos estas sorpresas do lado estadounidense”, abundou o presidente ucraíno, que deu a entender que esta inesperada iniciativa diplomática estaba liderada por Washington.
“Creo que está ben que a nivel táctico comece este encontro”, engadiu Zelenski, quen agregou que “os rusos teñen que estar listos para atopar compromisos, porque todo o mundo ten que estar listo, non só Ucraína”.
“É mellor ter reunións que non ter ningún tipo de diálogo”, continuou Zelenski sobre as conversacións, ao tempo que lembrou que o seu país, pese aos esforzos diplomáticos, segue baixo bombardeos diarios por parte de Rusia contra civís e infraestruturas enerxéticas.
Eses ataques obrigaron miles de persoas en Ucraína a afrontar sen calefacción as temperaturas baixo cero deste inverno, máis duro do habitual.
Sobre os plans de cara á cita nos EAU, Zelenski explicou que o equipo negociador estadounidense se reunirá primeiro cos seus homólogos ucraínos e logo coa parte rusa, despois de que este xoves o xefe de Estado de Ucraína se reunise durante case unha hora en Davos co presidente dos EUA, Donald Trump.
“Queriamos rematar con esta guerra mañá pero, se continúa, Rusia verá reducido o seu Exército e Putin terá que levar a cabo unha nova mobilización”, concluíu.
