Xuíces e fiscais protestan en Madrid contra as reformas xudiciais do Goberno
A concentración serviu como antesala da folga de tres días convocada para o 1, 2 e 3 de xullo
Nela oíronse berros de "independencia xudicial", así como algúns contra Pedro Sánchez e o ministro de Xustiza, Félix Bolaños
A concentración tivo lugar diante do Tribunal Supremo (EFE/ JP Gandul)
Centos de persoas, entre eles decenas de xuíces e fiscais, concentráronse este sábado fronte á sede do Tribunal Supremo para protestar contra os proxectos lexislativos emprendidos polo Goberno, que reforman o acceso á carreira e o estatuto do Ministerio Fiscal.
A concentración foi convocada por cinco asociacións de xuíces e fiscais que representan á maioría da carreira xudicial e fiscal e serviu como antesala da folga de tres días convocada para o 1, 2 e 3 de xullo polas mesmas asociacións.
Nela oíronse berros de "independencia xudicial", así como algúns contra o presidente do Goberno, Pedro Sánchez, e contra o ministro de Xustiza, Félix Bolaños.
Na manifestación, diferentes portavoces destas asociacións pediron a retirada de ambos os proxectos, que na súa opinión ameazan a independencia xudicial, ao berro de proclamas como "Sen Estado de Dereito non hai democracia" ou "Fiscalía imparcial".
Os organizadores da concentración deste sábado leron un manifesto onde declaran que non se trata dun acto contra o poder executivo nin contra o lexislativo, senón que é un acto "a favor do poder xudicial" e para "defender o que é de todos".
No manifesto destácase o papel da independencia xudicial, "clave para falar dunha democracia real", algo que está "baixo ameaza" polo proxecto de lei para modificar o acceso ás carreiras xudicial e fiscal e o anteproxecto de reforma do estatuto orgánico do Ministerio Fiscal (EOMF).
