Xa son 22 os mortos nos enfrontamentos rexistrados no Perú
Centos de turistas, entre eles varios galegos, atrapados no conflito
Os enfrontamentos entre os partidarios do encarcerado expresidente peruano, Pedro Castillo, e as forzas da Policía e dos militares deixaron ata o momento polo menos vinte e dous mortos, tres deles menores de idade. Centos de persoas, moitas delas policías, quedaron feridas.
A declaración do estado de emerxencia non frea as protestas
A declaración do estado de emerxencia feita pola presidenta Dina Boluarte, con toque de queda na maior parte do país, non impediu as protestas, especialmente duras en Apurímac, La Libertad, Ayacucho, Arequipa e Cusco.
Varios galegos teñen dificultades para saír do Perú
As protestas manteñen pechadas boa parte das estradas do Perú. Tamén hai dificultades nalgúns aeroportos e pasos fronteirizos. O conflito atrapou nas zonas turísticas do Perú centos de visitantes estranxeiros.
O Congreso peruano rexeita a reforma que posibilitaría o adianto electoral
Co expresidente Castillo en prisión preventiva polo menos durante os próximos dezaoito meses, o Consello do Estado e a presidenta do Perú pediron o cesamento da violencia e a recuperación do diálogo. O Congreso do Perú rexeitou a reforma constitucional necesaria para adiantar as eleccións.
