En Rusia celebran este sábado o día da Vitoria sobre a Alemaña nazi. Unha conmemoración que propiciou unha tregua de tres días na guerra con Ucraína.

Aínda así, o conflito condicionou o acto central da celebración: o desfile militar na praza Vermella de Moscova. Por vez primeira en anos non desfilaron nin tanques nin mísiles nin vehículos militares e a presenza de líderes mundiais foi moi escasa.

Putin aproveitou esta gran festa de exaltación nacionalista rusa para xustificar a guerra en Ucraína e para criticar o papel da OTAN. Pero o certo é, que tanto Rusia como Ucraína xa se están acusando mutuamente de violar o cesamento do fogo. 

"A pesar da tregua anunciada, as forzas ucraínas atacaron as posicións das nosas tropas con drons de asalto e artillería", sinalou o Ministerio de Defensa ruso nun comunicado.

En total, precisa a nota, os ucraínos realizaron doce intentos de avance cara ás posicións ocupadas polo Exército ruso en varios sectores da fronte.

Ademais, engade, os ucraínos golpearon infraestruturas civís en Crimea, varias rexións fronteirizas, o Cáucaso e outras rexións como a de Moscova e Perm (Urais).

Defensa estimou en 8.900 o número de violacións ucraínas do cesamento do fogo, o que inclúe máis de 7.000 ataques con drons e máis de mil ataques con tanques, artillería, lanzadeiras e morteiros desde a súa entrada en vigor a pasada medianoite.

Destacou que, en consecuencia, as súas tropas tiveron que responder "simetricamente" ás infraccións inimigas

Anteriormente, o Kremlin negou intentos de Ucraína de sabotear o desfile militar na praza Vermella con ocasión do 81 aniversario da vitoria do Exército Vermello sobre a Alemaña nazi na Segunda Guerra Mundial.

"Non intentaron nada. Todo foi ben", dixo Dmitri Peskov, portavoz presidencial, á prensa local.

O presidente dos EUA, Donald Trump, anunciou a noite do venres un acordo entre ambos os bandos en conflito para unha tregua de tres días (do sábado ao luns) en Ucraína.

A UE non quere "entorpecer" as negociacións entre Ucraína e Rusia lideradas por Trump

O presidente do Consello Europeo, António Costa, dixo este sábado que a Unión Europea non quere "entorpecer" as negociacións de paz entre Ucraína e Rusia emprendidas por iniciativa do presidente estadounidense, Donald Trump.

"Non queremos entorpecer a iniciativa liderada polo presidente Trump, así que estamos á espera", dixo o portugués en declaracións a xornalistas ao ser preguntado por este asunto, mentres se atopaba en Bruxelas celebrando o Día de Europa.

Costa engadiu, con todo, que a UE está disposta "a facer o que sexa necesario", xa que "tamén debemos abordar a cuestión relacionada coa seguridade de Europa".

"Estamos a falar cos nosos amigos ucraínos para apoialos. E, por suposto, necesitamos, no momento oportuno, manter conversacións con Rusia para abordar as nosas cuestións comúns en materia de seguridade", afirmou.

Costa mantivo tamén hoxe unha conversación co presidente ucraíno, Volodimir Zelenski, na que lle desexou un "Feliz Día de Europa" e aseguroulle que "o futuro de Ucraína reside na Unión Europea", segundo dixo o portugués nunha mensaxe en redes sociais.

Zelenski, pola súa banda, sinalou que abordaron así mesmo os recentes pasos diplomáticos e o mencionado acordo, coa mediación dos Estados Unidos, para levar a cabo un intercambio de prisioneiros con Rusia nun formato de 1.000 por 1.000.