A erupción do volcán Shiveluch provoca unha columna de cinzas de oito quilómetros de altura
Ocasionou un sismo de magnitude 6 no Pacífico e provocou máis de 30 réplicas na rexión de Kamchatka
O volcán, de 3.200 metros, está situado nun cordón de máis de 700 quilómetros na zona nororiental de Rusia que acumula un 12 por cento da actividade volcánica do planeta
Imaxes da erupción rexistrada no ano 2004 (Arquivo/Europa Press)
O volcán Shiveluch, situado na península de Kamchatka, lanzou hoxe unha columna de cinzas a unha altura de oito quilómetros sobre o nivel do mar e provocou un sismo de magnitude 6 e máis de 30 réplicas na rexión.
"A altura da columna de cinzas foi de 8.000 metros sobre o nivel do mar", indicou o Servizo Xeofísico da Academia Rusa de Ciencias de Kamchatka.
Segundo os científicos, canda a erupción foi detectado un terremoto de magnitude 6 no Pacífico a unha profundidade de 41 quilómetros baixo o fondo mariño".
"Despois, durante varias horas, na zona tiveron lugar preto de 30 réplicas", engadiron, ao sinalar que os residentes das localidades próximas só percibiron o primeiro sismo.
Un volcán de 3.200 metros situado na península rusa de Kamchatka
O Shiveluch, de 3.200 metros de altura e o máis setentrional de Kamchatka, é estudado con especial atención por vulcanólogos rusos e doutros países.
De acordo coas informacións recompiladas, as erupcións do Shiveluch son difíciles de prognosticar, porque na maioría dos casos foron súbitas.
As erupcións de 1854 e 1964 pola súa magnitude foron catalogadas de catastróficas, aínda que non causaron vítimas nin danos materiais.
Segundo vulcanólogos rusos, as erupcións do Shiveluch e doutros volcáns nesa zona nororiental de Rusia non adoitan ser perigosas porque se atopan moi apartados dos poboados.
Na península de Kamchatka existen 68 volcáns aliñados nun cordón de máis de 700 quilómetros que acumula un 12 por cento da actividade volcánica do planeta.
.png)