Xa é obrigatoria a avaliación de riscos laborais para as empregadas do fogar

O Ministerio de Traballo informou de que a súa web para avaliar os riscos laborais das empregadas do fogar sufriu un ataque informático que deixou fóra de servizo esta ferramenta, este xoves, un día antes de que acabara o prazo para ter formalizados os plans de prevención no emprego doméstico.

A plataforma púxose ao dispor dos fogares o pasado mes de maio, para que poidan completar a avaliación de riscos e coñecer as medidas de prevención necesarias para as persoas que traballan para eles, unha nova obrigación para a que se deron seis meses que rematan este venres. A partir de agora é obrigatorio telo feito. As sancións poden chegar aos 49.000 euros.

As claves das medidas de prevención de riscos laborais

Estas son algunhas claves do procedemento que supón incluír na prevención a un colectivo altamente feminizado e que non tiña este dereito ata o de agora.

O real decreto que regulou a protección da seguridade e a saúde no ámbito do servizo do fogar familiar estableceu que, unha vez habilitada a ferramenta para realizar esa avaliación, había seis meses de prazo para cumprir este paso. A plataforma (www.prevencion10.es) habilitouse o pasado mes de maio, polo que este novembro os empregadores deben ter realizada a avaliación e implementar as medidas preventivas necesarias para eliminar ou reducir os riscos detectados.

Todo o proceso faise desde esa plataforma accedendo á opción de prevención no fogar onde se deben introducir os datos do empregador, das persoas que traballan en casa e as tarefas que realizan. Con esa información faise a avaliación contestando unha serie de preguntas sobre bloques diferenciados e, se se detecta algún risco, a propia web suxire as melloras e solucións.

Entre as obrigacións está que os empregadores proporcionen gratuitamente ás persoas traballadoras "os equipos de traballo adecuados para o correcto desempeño das súas funcións" e que os repoñan cando resulte preciso. 

Tras a avaliación descárgase un documento denominado "Plan de prevención de riscos laborais" que deben asinar a persoa empregadora e a empregada, e estar dispoñible por se o require a Inspección de Traballo. Na plataforma tamén se inclúen materiais explicativos sobre prevención de riscos laborais adaptados para este colectivo e hai dispoñible un servizo de atención telefónica gratuíto.  Xunto a esta avaliación, a lei contemplou formación en prevención e recoñecementos médicos voluntarios.

En España hai unhas 348.000 mulleres afiliadas no sistema especial de empregadas de fogar. O 80 % delas ten máis de 40 anos e o 69 % ten orixe estranxeira ou dobre nacionalidade, segundo datos facilitados polo Ministerio de Traballo. Con todo, o colectivo sería superior, dunhas 463.600 persoas segundo a Enquisa de Poboación Activa, o que indica que unha cuarta parte (unhas 115.600 persoas) nin sequera está dada de alta na Seguridade Social e, por tanto, non se benefician de ningún dos avances.

Non ter o plan de prevención dispoñible e rubricado por ambas partes ou non aplicar as medidas preventivas podería supoñer sancións por parte da Inspección de Traballo que poden oscilar, en caso das leves, entre 45 e 2.450 euros, e en caso de graves, entre 2.451 e 49.180 euros.