Williot Swedberg, especialista en marcar goles decisivos
Dos tres goles que marcou esta temporada, dous deles déronlle o triunfo ao Celta
A campaña anterior xa fixera outros dous goles que trouxeron vitorias, unha delas tamén contra o Betis
Un gol de Williot Swedberg no treito final do partido seviulle ao Celta para culminar a remonta diante do Betis. Un partido que se torcera co 0-2 inicial e que conseguiu erguer o conxunto vigués na media hora final.
O sueco converteuse nun especialista en marcar goles decisivos e co conseguido nesta xornada xa leva catro nos dous últimos anos que deron os tres puntos.
Comezou a boa serie contra o Almería (2-3), cando non contaba con minutos no equipo de Benítez e apareceu no treito final para marcar un gol salvador. Aconteceu o mesmo diante do Betis na 23-24 ao lograr un gol no minuto 96 que tamén posibilitou a consecución dos tres puntos.
Foron cinco os goles que marcou Swedberg o ano pasado e tres os que leva anotados esta temporada na Liga. Na primeira xornada tivo unha aparición estelar contra o Alavés, cun gol que supuxo o empate cando o Celta estaba contra as cordas.
