Von der Leyen defende o acordo arancelario cos Estados Unidos como unha aposta pola "estabilidade"

A presidenta da Comisión Europea, Ursula von der Leyen, defendeu o acordo arancelario alcanzado entre a Unión Europea e o presidente estadounidense, Donald Trump, o 27 de xullo como unha "decisión consciente" en favor da "estabilidade e a previsibilidade" fronte á "escalada e a confrontación".

Von der Leyen, nunha columna para o diario alemán Frankfurter Allgemeine Zeitung, que será publicada o luns e que adiantan as axencias alemás, insiste en que este acordo tiña un carácter prioritario, dada a importancia dos asinantes e a realidade internacional de bloques.

"Imaxinemos por un momento que as dúas maiores economías do mundo democrático non chegasen a un acordo e iniciasen unha guerra comercial. Iso só sería celebrado en Moscova e Pequín", indicou.

O acordo pactado en Turnberry (Escocia) fixa o establecemento de gravames do 15 por cento para produtos europeos e compromete o bloque europeo a facer investimentos adicionais así como á adquisicións de enerxía e armamento. Esta porcentaxe, entendeu Von der Leyen, é máis que aceptable a cambio de evitar medidas de represalia que deteriorarían gravemente a economía europea.

"Con aranceis recíprocos da nosa parte, correriamos o risco de iniciar unha custosa guerra comercial con consecuencias negativas para os nosos empregados, consumidores e a nosa industria", xustificou entre as críticas ás tácticas de negociación da Comisión, que outorgan aos Estados Unidos mellores condicións que as que se aplican ás empresas da UE.