Visto para sentenza o xuízo polo acoitelamento dun menor á saída dunha discoteca compostelá

Derradeira xornada do xuízo polo acoitelamento dun menor durante unha liorta ás portas dunha coñecida discoteca compostelá hai dous anos.

Oito testemuñas que dunha ou outra maneira interviñeron ou presenciaron a pelexa en que se produciu a agresión o 8 de xaneiro de 2023 declararon na segunda xornada do xuízo. Dous dos amigos da vítima describiron o golpe co que presuntamente o acusado lle asestou a coitelada á vítima, aínda que ningún viu nese momento a arma.

Declarou tamén un dos axentes que detivo o acusado tras a agresión e os peritos médicos. Describiron as lesións sufridas pola vítima, ao que tiveron que extirparlle o bazo, e tamén unha ferida no abdome que presentaba o imputado. A acusación axuntou un informe pericial do ADN da roupa dos implicados. Determina que o acusado tiña sangue da vítima no suadoiro que levaba e no peto do pantalón, compatible con que gardara nel a arma usada na agresión.

Nas súas conclusións, o fiscal mantén a petición de 9 anos de prisión por un delito de homicidio en grao de tentativa, pena que a acusación eleva a 10 anos. O avogado da defensa solicita a libre absolución. Considera que non quedou demostrado que o acusado fose o autor dos feitos, a arma non apareceu e en todo caso actuou en lexítima defensa durante a liorta. O caso quedou visto para sentenza.