Villares pide a baixa temporal no PPdeG e a oposición critica o apoio a un denunciado por agresión sexual

Alfonso Villares, que dimitiu este mércores como conselleiro do Mar tras unha denuncia na súa contra por agresión sexual, pediu a baixa temporal de militancia do PPdeG, informou este xoves a secretaria xeral do partido en Galicia, Paula Prado.

Prado dixo en conferencia de prensa que ela tivo coñecemento da denuncia e da investigación a Alfonso Villares na xornada do mércores, cando o tamén presidente do comité electoral do PPdeG anunciou a súa dimisión.

A número dous do partido en Galicia fixo estas declaracións apenas uns minutos despois de que o seu xefe de filas, Alfonso Rueda, dixese que coñecía a denuncia contra Villares desde o pasado mes de febreiro.

Sobre esta cuestión remitiuse ao que puidese dicir o presidente da Xunta e destacou que o xa exconselleiro renunciara ao aforamento para ser investigado e, de darse o caso, xulgado "como un cidadán máis" por un tribunal ordinario.

Esta situación "contrasta con outros sitios", apuntou, en alusión ao secretario xeral do PSOE de Estremadura, Miguel Ángel Gallardo, que se converteu en deputado autonómico, de modo que estará aforado no proceso xudicial que afronta.

Críticas da oposición

A oposición considerou este xoves que a actuación da Xunta e do Partido Popular supón un manual de todo “o que non se pode facer” ante un caso de presunta agresión sexual, porque en ningún modo solidarizáronse coa vítima, pero si en cambio co acusado.

A portavoz de Feminismo e Igualdade do BNG, Noa Presas, acusou o presidente da Xunta de encubrir ao extitular de Mar a pesar de coñecer desde febreiro a denuncia por agresión sexual e ve “un disparate” que o Goberno galego dea o seu respaldo ao dimitido.

En conferencia de prensa, Presas insistiu en que “o presidente ten que dar explicacións” porque confesou que “leva catro meses encubrindo un presunto agresor sexual”.

“É impresentable”, incidiu a deputada nacionalista que ademais cre que o xefe do Executivo galego, ao dicir que espera recuperar a Villares para a vida pública cando se resolva a denuncia, está “a insinuar” que esta é “falsa”.

Pola súa banda, a portavoz de Igualdade do grupo socialista, Paloma Castro, afeou o respaldo que dirixentes do PP e da Xunta están a ofrecer a Villares. 

“Eu no seu lugar estaría apartado da vida pública”, dixo. Castro considerou que as declaracións dos dirixentes do PP “van pasar aos anais da historia do que nunca se debe facer” nun caso de posible agresión ás mulleres dado que é “intolerable” que falen de “heroísmo” ao referirse á decisión de dimitir adoptada por Villares.

A deputada socialista cre que Villares dimitiu “porque é o que quedaba cando estaba atrapado nunha causa que lle ía explotar”.