Veciños e comerciantes de Foz denuncian que hai tres homes que alteran a convivencia
Ao parecer o grupo dedícase a danar vehículos, ameazar e mesmo agredir fisicamente outras persoas
Un deles ten un can que xa atacou dous homes, un deles leva unha semana ingresado no hospital debido á gravidade das feridas
Aumentan os problemas de seguridade na rúa Corporacións de Foz. A Garda Civil tivo que intervir en varias ocasións ante a actitude violenta dun grupo de tres homes que ameaza os veciños, provocan danos nos coches e vanse sen pagar dos establecementos.
"Levan un tempo aquí en Foz, creando leas, rompendo os cristais dos coches e facendo estragos", explica un veciño
O episodio máis grave ocorreu nesta lavandería. Un veciño foi atacado polo can dun dos alteradores. O home leva unha semana no hospital debido á gravidade das súas feridas.
"Por culpa dun can que estaba sen bozo, el foi sacalos e o can atacoulle" di un veciño.
Outro hostaleiro tamén foi atacado polo can. O animal levárono a unha canceira.
"Sóltao e increpa a xente con el e o can faille bastante caso no tema agresivo", di unha muller.
Os veciños teñen medo e reclaman máis control policial.
"É unha inxustiza, isto ten que estar máis controlado pola policía", comenta unha veciña.
O grupo conflitivo fórmano dous mozos duns 20 anos e un home de 40. Dormen nos portais e xa os botaron doutras localidades.
