USAID non atopa probas dun roubo masivo de axuda por parte de Hamás, como din Israel e os EUA

A Axencia de Estados Unidos para o desenvolvemento (USAID) non atopou probas dun roubo masivo de axuda humanitaria en Gaza por parte de Hamás, segundo informou este venres a cadea CNN.

A análise interna contradi un dos principais argumentos usados polo Goberno de Donald Trump e Israel para só dar acceso a unha entidade privada, Gaza Humanitarian Fund (GHF), á distribución de axuda na Franxa de Gaza.

O documento interno de USAID examinou 156 incidentes de desperdicio, fraude e abuso reportados por organizacións socias de EE.UU. entre outubro de 2023 e maio de 2025.

A revisión dos incidentes "non atopou vínculos" con grupos sancionados nin organizacións terroristas estranxeiras, sinala CNN.

A Oficina do Inspector Xeral de USAID, segundo sinalou un voceiro, "advertiu consistentemente a USAID, ás ONG e á ONU dos riscos de que a axuda humanitaria sexa desviada cara a Hamás e outras organizacións terroristas".

"As nosas investigacións relacionadas con Gaza continúan, incluíndo aquelas sobre empregados de UNRWA que participaron nos ataques terroristas do 7 de outubro", agregou o portavoz en referencia a traballadores da axencia da ONU para os refuxiados en Palestina.

Más de 2.000 organizacións de dereitos humanos, incluíndo Médicos Sen Fronteiras, denunciaron que o actual sistema de distribución de axuda humanitaria en Gaza é "mortal".

Segundo datos do Ministerio de Saúde palestino, máis de 1.000 persoas foron asasinadas polas forzas israelís cando tentaban recoller axuda humanitaria. A maioría deles, ao achegarse aos centros de GHF.

"Hoxe, os palestinos en Gaza enfrontan unha elección imposible: morrer de fame ou arriscarse a que lles disparen mentres tentan desesperadamente conseguir comida para alimentar ás súas familias", indica a misiva das 200 organizacións, publicada o 1 de xullo.

Os 400 puntos de distribución de axuda que operaban durante o cesamento do fogo temporal en toda Gaza foron substituídos por só "catro sitios de distribución controlados por militares", o que obriga a dous millóns de persoas a concentrarse en zonas militarizadas e saturadas, denuncia o texto.

Nas mesmas, sublíñase que hai "disparos diarios e numerosas vítimas mentres tentan acceder a alimentos".

Un dos momentos máis criticos a nivel humanitario

A Franxa de Gaza afronta un dos momentos máis críticos a nivel humanitario debido ao longo bloqueo israelí á entrada de alimentos, auga, medicamentos e combustibles, o que disparou este tipo de mortes nas últimas semanas.

Desde o 2 de marzo, Israel apenas permite a entrada de subministracións a Gaza -alimento, auga, medicamentos e combustible -, a pesar de que a ONU asegura ter comida suficiente para alimentar a toda Gaza durante os próximos meses.

Os directores de diferentes hospitais en Gaza levan días alertando de que gran parte da poboación está exhausta, e que cada vez chegan máis casos de desmaios e de pacientes con síntomas de inanición. Algunhas familias, din, tentan acalar a fame e o pranto dos seus fillos dándolles auga con sal.

Ademais, máis de mil palestinos foron asasinados preto dos complexos militarizados, un no centro e tres no sur, xestionados pola polémica GHF ou en ataques preto dos postos militares onde chegan algúns camións da ONU.