United Airlines ofertará voos directos de Nova Jersey a Santiago

A aeroliña estadounidense United Airlines anunciou este xoves que ofrecerá voos directos desde Newark (Nova Jersey) ata Santiago de Compostela a partir de maio de 2026.

O voo sairá desde o aeroporto de Newark, un dos que serve a Nova York, tres veces por semana a partir do 22 de maio, no que supón o primeiro servizo regular entre os Estados Unidos e a cidade galega, segundo un comunicado da empresa.

En concreto, o avión en sentido Nova York sairá de Lavacolla os luns, xoves e sábado ás 10.00 horas; e regresará á comunidade os mércores, venres e domingos ás 19.15 horas.

Así, o voo entre Santiago e Nova York realizarase en 7 horas e 50 minutos. En sentido inverso, desde Newark cara a Galicia, completarase en 7 horas.

Con este nova ruta, a compañía xa conta con seis destinos a España, entre os que tamén se inclúen Madrid, Barcelona, Málaga, Palma de Mallorca e Bilbao. O voo de Santiago de Compostela operará nun Boeing 737-MAX8.

"Coa incorporación destes novos voos e o regreso de todos as rutas establecidos o ano pasado, agora United voa a 46 cidades a través do Atlántico, máis que calquera outra aeroliña", apuntou o vicepresidente sénior de Planificación de Rede Global e Alianzas da empresa, Patrick Quayle, no comunicado.

Ademais da conexión con Santiago de Compostela, United anunciou que voará ata Split (Croacia) a partir do 30 abril, Bari (Italia), Glasgow (Escocia), Reikiavik e Seúl, e engadirá un terceiro voo a Tel Aviv (Israel) o 28 de marzo.

Todos estes voos operarán desde o aeroporto de Newark. En total, United ofrecerá case 3.000 voos internacionais de ida e volta cada semana no verán de 2026.

Aena celebra a noticia

Logo de facerse público o anuncio, Aena celebrou "o éxito que supón esta noticia para o territorio e para a infraestrutura". Asegura que traballaron "de forma incansable" nos últimos meses coa compañía aérea estadounidense para lograr este fito. 

“Paso histórico” para Santiago e Galicia

A concelleira de Turismo de Santiago, Míriam Louzao, valorou “dun xeito moi positivo” esta mellora da conectividade para o Rosalía de Castro e “para todos os galegos”.

A concelleira destaca que a compañía xa puxo á venda os billetes e aposta por seguir traballando “nun momento complicado” para a terminal compostelá co obxectivo de que se abran novas rutas e máis compañías cheguen a Santiago.

Ao respecto, a Xunta considera que se trata dun “paso histórico que reforza a posición de Galicia como destino internacional e consolida a planificación do Goberno galego de promoción cos Estados Unidos como mercado prioritario”.

A Consellería de Emprego subliña que “en decisións como esta tivo unha importante contribución a promoción na orixe realizada pola Xunta de Galicia neste mercado, que supuxo o alto interese do destino Galicia entre os estadounidenses”.

O Goberno galego destaca que os Estados Unidos son o primeiro mercado internacional en termos de gasto total en Galicia, cun gasto diario de 296 millóns entre xaneiro e agosto deste ano.

Un total de 156.149 estadounidenses visitaron Galicia nos oito primeiros meses de 2025, un 13,4 % máis.