Unha persoa queda ferida e catro ovellas morren tras o incendio de cinco alpendres en Redondela
A intervención dos servizos de extinción impediu que as lapas devorasen unha vivenda
Unha persoa sufriu queimaduras nun brazo nun incendio en Redondela. No sinistro, morreron catro ovellas. As chamas acabaron calcinando cinco alpendres, dous coches e un motocultor, pero a vivenda salvouse grazas á intervención dos servizos de extinción.
O 112 Galicia recibiu o aviso minutos antes das 03:20 da madrugada deste luns a través dun particular que explicou que ardían uns alpendres próximos á súa vivenda no Camiño do Val do Muíño-Viso, en O Viso (Redondela).
No operativo participaron Urxencias Sanitarias de Galicia-061, os Bombeiros do Porriño e axentes da Garda Civil e da Policía Nacional.
A pasada madrugada outro incendio en Rianxo queimou a campá extractora e os mobles de cociña dun piso situado na rúa de Xosé María Brea Segade. Unha persoa foi evacuada ao Hospital Clínico de Santiago.
