Unha muller está hospitalizada na UCI tras a agresión da súa parella en Cerdedo-Cotobade
O home, de 48 anos, foi detido pola Garda Civil e tras pasar a disposición xudicial quedou en liberdade investigado por un delito de lesións no ámbito da violencia sobre a muller e con medidas cautelares
A Garda Civil investiga como agresión machista o caso dunha muller de 41 anos que foi ingresada na UCI tras aparecer ensanguentada e coa cara chea de golpes en Cerdedo-Cotobade.
A súa parella, un home de 48 anos, foi detido e pasa a disposición xudicial na tarde deste luns. A xuíza decretou a súa posta en liberdade. Está investigado por un delito de lesións no ámbito da violencia sobre a muller, con obrigación de comparecer os días 1 e 15 de cada mes. Tamén se lle impuxeron as medidas cautelares de prohibición de aproximarse e de comunicarse coa vítima.
Os feitos rexistráronse o pasado sábado 11 de xullo nunha aldea do municipio. A muller apareceu tirada no exterior da vivenda e, aínda que consciente, estaba cuberta de sangue e presentaba numerosos golpes na cara.
A vítima case non puido comunicarse cos veciños que acudiron a auxiliala tras escoitar os berros, ao non falar español. Tras alertar á Garda Civil, os axentes arrestaron á súa parella, que é de orixe española, como presunto autor dun delito de violencia de xénero.
Ao estar ingresada na UCI en estado moi grave, os investigadores aínda non puideron interrogar á muller.
