Unha muller de 34 anos, asasinada a puñaladas pola súa parella en Barcelona

Os Mossos d'Esquadra detiveron na madrugada deste mércores o presunto autor do asasinato da súa parella, de 34 anos, nun piso de Barcelona, tras entregarse nunha comisaría da policía da Generalitat.

Segundo informou a policía catalá, a detención produciuse ás 01:25 horas desta madrugada e a investigación continúa aberta. Fontes policiais concretaron que o presunto autor se presentou voluntariamente na comisaría do Eixample dos Mossos d'Esquadra. 

O crime produciuse o martes pola tarde, cando un home asasinou a puñaladas unha muller nun domicilio da rúa Andrade, no distrito de Sant Martí de Barcelona. O autor da agresión fuxiu tras o apuñalamento. Os Mossos recibiron ás 19:47 horas o aviso de que se producira unha agresión nun domicilio e enviaron varias patrullas ao lugar do suceso.

Os axentes acharon no interior da vivenda unha muller ferida de gravidade, que foi atendida polos servizos de emerxencias, que posteriormente confirmaron o seu falecemento.

A División de Investigación Criminal dos Mossos d'Esquadra fíxose cargo das investigacións.

De confirmarse este caso como un asasinato machista, serían 32 mulleres as vítimas mortais da violencia de xénero no que vai de ano, 1.373 desde 2003.

A Generalitat e o Concello de Barcelona condenaron este mércores o feminicidio, o cuarto que se produce no que vai de ano en Cataluña.O consistorio convocou un minuto de silencio mañá, xoves, na praza Sant Jaume de Barcelona en sinal de rexeitamento deste asasinato.

As vítimas da violencia machista e a súa contorna poden pedir axuda en distintos recursos activos todos os días da semana e as 24 horas do día: o teléfono 016, o correo electrónico 016-online@igualdad.gob.es e a canle do WhatsApp no número 600 000 016.

Nunha situación de emerxencia pódese chamar ao 112 ou aos teléfonos de emerxencias da Policía Nacional (091) e da Garda Civil (062) e, se non é posible facer esa chamada, en caso de perigo existe tamén a opción de activar a aplicación ALERTCOPS, que envía un sinal de alerta á Policía con xeolocalización.