Un veciño de Monte Alto, na Coruña, premiado con máis de dous millóns na Bonoloto

Unha combinación dos números 4, 22, 23, 31, 32 e 47. Complementario o 36 e reintegro, o 0. Este é o boleto selado na administración número 21 de Monte Alto e o premiado con 2 millóns, 42 mil euros no sorteo da Bonoloto.

"Unha felicidade moi grande", asegura Manuel Mahía, propietario da administración.

O agraciado, que prefire manterse no anonimato, acudiu esta mesma mañá a comprobar o seu boleto. É un veciño do barrio de Monte Alto, cliente habitual da administración, que xogou un boleto múltiple. Ante as nosas preguntas sobre que facer cos cartos, botaba man da retranca: "Pódense facer tantas cousas!"

O premio alterou a actividade diaria dun dos loteiros máis populares de Monte Alto. Manuel xa repartiu importantes premios nos últimos anos. Entre eles un Gordo de Nadal e agarda seguir coa sorte.

"Xa lle dixen a unha clienta que non perda a esperanza, que esta noite hai 181 millóns e oxalá teñades que volver mañá".

O premio é a nova do día en Monte Alto. Foron moitos os veciños que se achegaron á administración para coñecer máis detalles e felicitar ao loteiro. Na administración xa botan contas metidos xa de cheo na campaña de lotaría de Nadal. Agardan que este premio axude a aumentar as vendas.