Un matrimonio de avanzada idade de Cangas foi evacuado por un incendio no seu piso
As dúas persoas, de 69 e 70 anos, unha delas encamada, presentaban síntomas de intoxicación por fume
O incendio ocorreu nunha vivenda situada na rúa dos Heroes de 1617, no concello pontevedrés de Cangas, e afectou só un cuarto. As fontes de emerxencias indicaron que as lapas danaron as cortinas e unha cadeira de rodas que había no interior da estancia.
A muller alertou o 112 indicando que empezaba a arder o cuarto do seu home, que estaba encamado. Pensaba que ela mesma dera extinguido as lapas coa axuda de toallas molladas, pero, aínda así, solicitaba asistencia para o seu home, que se atopaba encamado.
Os dous precisaron ser evacuados a un centro hospitalario de Vigo por intoxicación por inhalación de fume.
Foron alertados os Bombeiros do Morrazo, que, tras chegaren, confirmaron que o lume xa fora extinguido case na súa totalidade polos particulares. Iso si, indicaron que a persoa que estaba encamada precisou ser trasladada nunha ambulancia dos servizos sanitarios, ao presentar síntomas de intoxicación.
Ademais do persoal sanitario e dos Bombeiros, os xestores de emerxencias deron conta dos feitos aos axentes da Policía Local.
