Un gol postreiro de Resende dálle o derbi o Pontevedra (2-1)

O mellor que pode dicir do Pontevedra no arranque do derbi e que se xogou ao que eles prepararan, ao que querían. E que o Rácing, nese arranque, viuse incómodo, como sorprendido. O inicio marcárono as transicións granates e as pelotas quedas. Nada novo, por outra banda, no xogo local. Pero para cando o Rácing quixo bulir xa ía por baixo, co 0-1. Foi logo dun córner de Yelko que cabeceou Alain Ribeiro (minuto 19). 

A partir de aí o cadro do Lérez reafirmou a súa aposta de pecharse, roubar e saír. E o Rácing cargou coa posesión. Cargou porque foi unha posesión pouco produtiva, que apenas nos deixou un lanzamento con perigo na primeira parte. O de Azael no minuto 38. E a cabezada de Álvaro Giménez, nunha das escasas transicións que puido facer o Rácing. Foi a última xogada da primeira parte.

O da segunda metade foi outra historia. Porque a diferenza da primeira, a posesión do Rácing traduciuse en ocasións. E en gol. O que conseguiu Zalaya (minuto 54). O Rácing foi mellor na continuación e as paradas de Marqueta axudaron o Pontevedra. Pero o que máis axudou os granates foi o seu poderío no balón parado. Porque, cando quedaban oito minutos para o final, outro córner de Yelko Pino, volveuno tocar Alain e acabou por mandalo á rede Resende (minuto 82). 

Con este resultado, o Pontevedra e o Rácing igualan a 30 puntos na zona de playoff da clasificación.