Un ataque con mísiles balísticos deixa sen luz 600.000 persoas en Ucraína

Rusia lanzou durante a noite deste martes e a madrugada deste mércores 39 mísiles balísticos e 120 drons de ataque, algúns deles con munición de acio, dirixidos sobre todo contra o sistema enerxético e contra outras infraestruturas críticas nas rexións de Kíiv e Khárkiv, segundo dixo na súa conta de X o presidente ucraíno Volodimir Zelenski.

Unhas 600.000 persoas quedaron sen electricidade como consecuencia deste ataque que, tamén segundo Zelenski, provocou danos en 26 instalacións do sistema eléctrico ucraíno e noutras catro infraestruturas do sector gasístico e petroleiro do país.

Segundo a Forza Aérea Ucraína, as súas defensas só puideron derrubar 4 dos mísiles e 115 drons.

Catro mortos e unha vintena de feridos tras unha noite de ataques

Polo menos catro persoas morreron e máis de vinte foron feridas na madrugada do mércores na capital ucraína en novos ataques rusos dirixidos contra infraestruturas enerxéticas e algúns edificios residenciais, segundo informou na súa canle de Telegram o alcalde de Kíiv Vitali Klitschko.

Medios ucraínos informaron de explosións tamén en cidades como Khárkiv (nordés) e Dnipró (centro-leste).

"Pedimos aos EUA e ao mundo enteiro que non pechen os ollos a esta realidade e que respondan, que respondan con forza", dixo Zelenski.

Tanto o presidente ucraíno como o activista Sergei Sternenk denunciaron este mércores que o servizo que os satélites estadounidenses Starlink prestan ao exército ucraíno foi restrinxido durante a madrugada.

Ucraína foi privada desta información capital para a súa defensa despois de que os EUA advertisen repetidamente a Zelenski de que poderían cortarlle a subministración de intelixencia que recibe se Ucraína non deixa de atacar refinerías rusas como lle esixe Washington apelando á estabilidade do mercado internacional de combustible.