Bulgaria acusa a Rusia de afundir un cargueiro e danar outro no mar Negro
Como consecuencia dos ataques, once mariñeiros continúan desaparecidos
O Goberno búlgaro convocou a embaixadora rusa para pedirlle explicacións: "Non contamos con probas sólidas e claras, pero a lóxica apunta á Federación Rusa"
Membros da tripulación dun barco danado no ataque con avións non tripulados perpetrado en augas de Bulgaria, no Mar Negro, o pasado 6 de outubro (REUTERS/Petko Momchilov)
Un cargueiro afundiuse e outro resultou danado en ataques con drons na madrugada do luns ao martes moi preto das augas territoriais búlgaras no mar Negro, segundo confirmou o Goberno de Bulgaria, que indica que todo apunta a que Rusia é responsable.
Os equipos de rescate localizaron con vida a cinco dos dezaseis mariñeiros que viaxaban no barco afundido, segundo sinalou o gobernador da rexión Dobrich, mentres seguen as tarefas para atopar aos outros once.
Trataríase do Azov Concord, un cargueiro con bandeira de San Vicente e as Granadinas que viaxaba desde Romanía cara a Turquía.
O barco afundido foi atacado a 17 millas náuticas (27 quilómetros) da cidade costeira búlgara de Krapets, preto da fronteira con Romanía.
No outro ataque, a 18 millas (29 quilómetros) de Byala, resultou danado o cargueiro de propiedade ucraína Chelsea 3, que viaxaba con bandeira de Malta desde Turquía a Romanía.
O Goberno búlgaro convocou a embaixadora rusa para pedirlle explicacións. "Non contamos con probas sólidas e claras para imputar cargos a ningunha das partes, pero a lóxica, como xa indiquei, apunta á Federación Rusa", afirmou o primeiro ministro nun vídeo subido ás redes sociais.
Rumen Radev cualificou de inaceptable estes novos ataques contra buques mercantes preto das augas territoriais de Bulgaria e anunciou que informou aos seus socios da UE e da OTAN sobre este novo incidente.
"Continuaremos solicitando e insistindo en recibir axuda para reforzar a vixilancia do espazo aéreo e marítimo e fortalecer a nosa capacidade de resposta", salientou Radev, que pediu axuda tamén para aclarar a orixe desas agresións.
"Manterei unha conversación co secretario xeral da OTAN, Mark Rutte", dixo Radev, que se opón a que a UE axude a Ucraína a defenderse da agresión rusa.
O pasado 6 de outubro o cargueiro Alfa Watan afundiu con dez persoas a bordo, que seguen desaparecidas, despois de ser atacados con drons en augas da zona económica exclusiva de Bulgaria cando viaxaba cargado de sal desde Exipto a Romanía.
Ese mesmo día, o buque Able, cun cargamento de trigo, quedou moi danado noutro ataque parecido, aínda que os seus dezaoito tripulantes puideron ser rescatados con vida.
.png)
