Publicador de contidos

Publicador de contidos

Últimas horas para solicitar o voto por correo para o 29-N

Últimas horas para solicitar o voto por correo para o 29-N

Para votar por correo cómpre obter un certificado de inscrición no censo electoral e contar coa documentación enviada ao enderezo indicado na solicitude

Os electores poden exercer o seu dereito ao voto ata o 25 de novembro

Arquivo TVG Arquivo TVG
G24.gal 18/11/2026 10:11

Os electores que desexen participar nas vindeiras eleccións, pero que non poidan ou non queiran votar presencialmente o día 29, aínda teñen de prazo ata este xoves para solicitar o voto por correo; poden facelo a través da páxina web de Correos ou presencialmente en calquera oficina postal.

O sistema de voto por correo está a ser elixido por un número crecente de votantes, tal e como mostran os datos do operador postal público.

Produciuse un aumento moi significativo nas últimas eleccións xerais de 2023, cando Correos tramitou 2.622.808 solicitudes de voto por correo: 1.924.976 presentadas presencialmente en oficinas postais e 697.832 tramitadas a través de Internet.

Finalmente, o 94,2 % das persoas que solicitaron o voto por correo -un total de 2.471.935- emitiron o seu voto por esta vía. Esta cifra supón a taxa máis alta rexistrada ata a data neste tipo de comicios (desde 2008, ano a partir do cal se dispón de rexistros estatísticos normalizados).

Os case 2,5 millóns de votos por correo emitidos en 2023 case duplicaron os 1,24 millóns rexistrados nas eleccións xerais do 28 de abril de 2019, e superaron nun 175 % os aproximadamente 900.000 votos recibidos por este sistema nas eleccións xerais do 10 de novembro dese mesmo ano.

Un proceso seguro

O sistema de voto por correo é un proceso seguro que conta con garantías para identificar os electores, protexer os sobres que conteñen as papeletas e transportalos ata a mesa electoral.

Para votar por correo, é imprescindible obter un certificado de inscrición no censo electoral. Con este documento -xunto coa documentación enviada ao seu domicilio ou ao enderezo indicado na solicitude-, os electores poden exercer o seu dereito ao voto ata o 25 de novembro.

Os electores que decidan solicitar o voto por correo a través do sitio web de Correos (www.correos.es) deben verificar a súa identidade mediante autenticación electrónica e sinatura dixital. Quen prefira facer a solicitude presencialmente deberá presentar o orixinal do seu Documento Nacional de Identidade (DNI), pasaporte ou permiso de conducir nunha oficina de Correos da súa elección.

Nas oficinas de Correos -onde se pode solicitar cita previa a través da aplicación da empresa pública, do seu sitio web ou da Oficina Virtual do Goberno de España-, tamén é posible que unha persoa solicite o voto por correo en nome doutra que non poida facelo por enfermidade ou discapacidade. Nestes casos, a situación debe acreditarse mediante un certificado médico oficial, e é necesario presentar unha autorización notarial ou consular.

Correos custodiará de forma segura toda a correspondencia dirixida ás mesas electorais ata o día das eleccións e levará un rexistro de toda a documentación recibida, que se poñerá a disposición das xuntas electorais. O 29 de novembro, unha vez finalizada a votación e antes de comezar o escrutinio oficial, os membros da mesa electoral introducirán na urna os sobres recibidos por correo, para que sexan incluídos no reconto público dos votos.

Publicidade
Publicidade
Publicidade
Publicidade