Trump envía dous submarinos nucleares a augas próximas a Rusia

O enfrontamento nas redes sociais entre Donald Trump e o dirixente ruso Dimitri Medvédev vai a máis, ata o punto de que o presidente norteamericano ordenou o envío de dous submarinos dotados de armamento nuclear a augas próximas a Rusia.

Trump anunciou a decisión a través da súa rede social, cualificando de tolas e incendiarias as palabras de Medvédev, exprimeiro ministro ruso e actual vicepresidente do consello de seguridade nacional en Moscova.

O mandatario norteamericano engadiu que as palabras poden desencadear consecuencias imprevistas e rematou sinalando que agarda que esta non sexa unha destas ocasións.

Rusia non acepta as ameazas de Trump

As diferenzas entre os gobernos de Trump e Putin veñen dadas polas saídas á guerra en Ucraína. O norteamericano Trump ameazou con fortes aranceis se Moscova non acepta un cesamento do fogo en Ucraína.

Medvédev contestoulle que Rusia non acepta as ameazas dos Estados Unidos, engadindo que Rusia non é Israel nin Irán, e que cada ameaza é un paso máis cara á guerra.

Mentres os submarinos nucleares norteamericanos preparan a súa viaxe a zonas indeterminadas, pero próximas a Rusia, Donald Trump di que vai enviar o seu negociador Steve Witkoff a Moscova, para negociar co Goberno de Putin o cesamento do fogo en Ucraína.