Trump entra con forza na campaña das lexislativas: "Non me van silenciar"

O ex presidente estadounidense Donald Trump máis que un mitin o que fixo esta fin de semana en Pensilvania pareceu un axuste de contas. Na súa primeira intervención en público desde o rexistro da súa mansión de Mar a Lago na Florida entrou con forza na campaña das lexislativas para arremeter contra o seu sucesor, Joe Biden, e deixando claro que non o van silenciar.

O republicano despois de que o actual mandatario o acusara nun discurso en Filadelfia de ser unha ameaza para a democracia, atacou a Biden directamente. "O inimigo do Estado e el e o grupo que o controla", dixo.

Antes de comezar a intervención, nas pantallas de televisión do recinto proxectouse un vídeo no que se ve a Biden tropezar nunhas escaleiras, quedar en branco ou tatexar nun discurso para rematar cun lema: "Biden non pode falar. Como vai liderar?".

O baño de masas de Trump no pavillón de Wilkes-Barre focalizouse tanto en responder ao actual inquilino da Casa Branca, que o xoves o considerou un perigo para a democracia, coma en defender o movemento MAGA, acrónimo de "Make America Great Again", que foi o lema da súa campaña e da súa presidencia.

"O perigo para a democracia vén da esquerda radical, non da dereita" asegura Trump, que estima que as eleccións de medio mandato van ser un referendo sobre a "inflación disparada", os "millóns e millóns de inmigrantes" que entran de xeito ilegal no país ou a "corrupción e o extremismo de Biden e o Partido Demócrata".

Trump levanta paixóns. Falou ante case 8.000 persoas nun pavillón case cheo e entregado, con público de todas as idades, case tantas mulleres coma homes e familias completas de avós a netos. Case todos brancos, algún asiático e poucos afroamericanos.

O mitin supón o arranque non oficial da súa campaña para as lexislativas do 8 de novembro, que se están a converter en certo xeito nun corpo a corpo entre Biden e Trump.

En 2022 e nas presidenciais de 2024, engadiu Trump, os republicanos deben "devolverlle o poder á xente" porque do contrario, na súa opinión, o país "vai ser destruído".

Os demócratas, insiste, están intentando silencialos, pero remarcou en Pensilvania, un estado chave nas eleccións, onde Biden venceu nas presidencias de 2020 e Trump en 2016, que non o van lograr.

Entre os seus seguidores non pasou factura o escándalo do rexistro e dos seus documentos. Trump denunciou a entrada na súa vivenda como unha manobra política contra el os seguidores. Cualifica a actuación da xustiza e do FBI como "un dos abusos de poder máis escandalosos de calquera administración na historia dos Estados Unidos" e "unha parodia da xustiza, propia dun país do terceiro mundo", malia os indicios contra el, en particular o cento de documentos clasificados como confidenciais, secretos ou alto secreto que localizaron os axentes no rexistro, despois de que os avogados de Trump aseguraran que os devolvera todos.