Trump di que os axentes de inmigración levarán cámaras corporais
A decisión chega despois de que a policía matase dúas persoas en Mineápolis
Homenaxe a Renee Nicole, unha das vítimas dos axentes de inmigración dos EUA. REUTERS/Shannon Stapleton
O Goberno de Estados Unidos anunciou que os axentes de inmigración empezarán a levar cámaras corporais, cunha despregadura inicial en Mineápolis.
A medida chega despois de que os axentes matasen dous cidadáns durante actuacións oficiais na cidade.
A secretaria de Seguridade Nacional, Kristi Noem, indicou que a iniciativa se estenderá progresivamente a todo o país en función da dispoñibilidade orzamentaria.
A decisión foi coordinada co director interino do Servizo de Inmigración e Control de Aduanas, Todd Lyons.
Tamén co comisionado da Oficina de Aduanas e Protección Fronteiriza, Rodney Scott. E co responsable da política fronteiriza do Goberno de Donald Trump, Tom Homan.
Segundo explicou, o Departamento de Seguridade Nacional adquirirá e implantará rapidamente estes dispositivos en todo o país cando haxa financiamento suficiente.
O obxectivo é ampliar o programa a nivel nacional para todas as forzas de orde do departamento.
A semana pasada, Trump decidiu substituír o responsable das redadas migratorias en Mineápolis, o alto cargo da Patrulla Fronteiriza Greg Bovino.
No seu lugar situou a Tom Homan, co propósito de redefinir a estratexia tras os falecementos rexistrados na cidade.
Tras o anuncio, Trump afirmou que o uso de cámaras corporais é positivo para o labor policial na maioría dos casos.
O emprego destes dispositivos é unha das esixencias do Partido Demócrata para aprobar o orzamento anual do Departamento de Seguridade Nacional.
A falta de acordo sobre o financiamento provocou un novo peche parcial do Goberno federal.
Este podería rematar se a Cámara Baixa aproba un paquete provisional para financiar o departamento durante dúas semanas mentres continúan as negociacións.
