Trump asegura que Putin non atacará territorio da OTAN
Fixo estas declaracións un día despois da visita sorpresa do director da CIA a Moscova
O Kremlin negou este xoves que Rusia contemple atacar a un país da OTAN
Trump, este xoves en Washington (REUTERS/Evan Vucci)
O presidente dos Estados Unidos, Donald Trump, asegurou este xoves que mantivo "boas conversacións" co seu homólogo ruso, Vladímir Putin, e que este non atacará territorio da OTAN.
A preguntas de xornalistas no Despacho Oval, o mandatario estadounidense declinou comentar a visíta a Moscova do director da CIA, John Ratcliffe, ao mesmo tempo que asegurou que "(os rusos) non van atacar".
"Tiven boas conversacións con el (Putin). Non vai atacar territorio da OTAN", dixo sen detallar a data da charla.
Segundo medios, a visita de Ratcliffe a Rusia pretendía enviar unha mensaxe a Putin para disuadirlle dun suposto plan de ataque contra os aliados, no medio de avaliacións de intelixencia que indicaban que o Kremlin podería intentar poñer a proba á OTAN.
O propio Trump describiu este mércores a viaxe a Moscova como "semirutinaria".
O Kremlin negou este xoves que Rusia contemple atacar a un país da OTAN, á vez que acusou as nacións europeas de defender unha política agresiva cara a Moscova.
"Ultimamente, publícanse moitas historias de terror como esa. Naturalmente, isto non ten nada que ver coa realidade nin coas intencións da Federación Rusa", afirmou Dmitri Peskov, portavoz presidencial, na súa rolda de prensa telefónica diaria.
