Trump afirma que Irán lle pediu un cesamento do fogo e Teherán négao

O presidente dos Estados Unidos, Donald Trump, afirmou este mércores que Irán lle solicitou un "cesamento do fogo", e sinalou que considerará esa posibilidade unha vez que o estreito de Ormuz estea reaberto.

"O novo presidente do réxime iraniano, moito menos radicalizado e moito máis intelixente que os seus predecesores, acaba de pedir un cesamento do fogo aos Estados Unidos de América! Considerarémolo cando o estreito de Ormuz estea aberto, libre e despexado", asegurou Trump na plataforma Truth Social, sen especificar a que líder iraniano se refire.

Ata entón, agregou Trump, os Estados Unidos seguen "bombardeando Irán ata a aniquilación ou, como din algúns, ata que regrese á Idade de Pedra!".

Logo do anuncio do presidente estadounidense, a embaixada de Irán enEspaña asegurou nunha publicación en X que negan "oficialmente" que solicitasen o alto o fogo.

💥Última hora💥
Irán niega oficialmente las alegaciones de haber solicitado un alto el fuego. pic.twitter.com/uH2umNX4ht

— Embajada de Irán en España (@IraninSpain) April 1, 2026

Tamén o portavoz do Ministerio de Exteriores de Irán, Esmaeil Baqaei, desmentiu, segundo a axencia iraniana Mehr, ao presidente dos Estados Unidos e asegurou que as súas afirmacións son "falsas e infundadas".

O líder estadounidense prevé ofrecer un "importante" discurso á nación ás 21:00 horas de Washington (3 da madrugada hora galega) para informar sobre a guerra, nunha mensaxe que se produce tras unha serie de comentarios sobre o posible fin do conflito.

Trump afirmou o martes que prevé "retirarse" de Irán en "dúas ou tres semanas", ao asegurar que se están logrando os obxectivos da guerra iniciada o 28 de febreiro, como evitar que a República Islámica obteña unha arma nuclear.

Tras intentar sen éxito liderar unha coalición militar cos seus aliados para reabrir o estreito de Ormuz, vía crave para o comercio de cru que permanece bloqueada por Irán en resposta aos ataques estadounidenses e israelís, Trump dixo o martes que este xa non é un asunto dos Estados Unidos.

Trump instou os países da OTAN e ás nacións asiáticas a actuar con "coraxe" e "tomar" o estreito, por onde circula unha quinta parte do petróleo mundial.

Nunha entrevista publicada este mércores polo diario británico The Telegraph, Trump dixo que non descarta retirar os Estados Unidos da OTAN, unha organización que definiu como un "tigre de papel".